電單車手苦與樂-10件鐵騎士最討厭的事

車友們不管是日常以二輪代步還是假日才吹雞遊車河, 日常騎乘或停泊電單車時總會遇到一些討厭的事或者是衰人及賤人. steve在這裡吹水講下自己覺得最討厭的10件人或事. 如果車友們也有同感, 歡迎留言.

排頭位的當然是偷車賤賊, 弟弟曾不幸被賤賊偷去兩架電單車, 有時真係防不勝防. 不管是泊車場也好,還是泊街都好, 只要你架車有被偷的價值, 都有機會被偷的. 就算落最好的防盜, 最堅固的鎖頭亦難阻賤賊下手. 最佳的防盜方法是不要買車. ^^

第二位討厭的事就是泊車抄牌, 鐵騎士以電單車代步另一個吸引人的原因是方便快捷, 泊車容易有經驗的車友一般都識泊在方便又不阻人的地方, 大家都識自律, 當然不排除有些衰仔貪方便亂泊. 偏偏有些衰人眼紅投訴或者一些不講人情差佬左抄右抄, 係咪都抄一餐. 車友收到牛肉乾是最不開心了, 反觀steve曾到過的地方, 不論是日本, 台灣, 新西蘭還是番禺泊電單車都有自由度, 香港可能是全世界最嚴的.

第三位是泊街被人破壞甚至放火燒車. 香港真係有好多變態人手多多搞你部車, 有時擰走你個後鏡, 割破你架車座位包皮, 拉鬆火咀插, 甚至掉煙頭或故意點燃火頭燒車.

第四位是泊街位被人搞, 香港的街道電單車位可能是全世界最少的. 很多衰仔為免抄牌就明知無空位仍然拚命插, 結果兩個位泊三架車, 甚至四架都得. 人家的靚車往往被不小心刮花, 不夠位時動手搬車, 把人家的車搬出界外被抄, 有時搬車把人家架車的fairing扯爛, 推跌人家的車, 撞爛人家的後鏡. 一切罪魁禍首就是運輸署不肯增加車位.

第五位泊街時被人弄污. 有時你去拿車開鎖時見到車輪上有猫狗的撤尿. 畜生無性, 好難怪它們, 但steve有次去拿車是親眼目睹有個變態老狗主拉佢隻狗到steve架車撤尿. 結果被steve即時制止, 用粗口問候佢全家5分鐘. STEVE有時在車罩看到一口黃綠色濃痰或試過泊車在食店前排骨位被人倒餿水. 成架車臭到唔想碰. >.<

第六位是駕駛時遇到前車有人放飛劍, 當打中你的頭盔風鏡時, 想起來都想嘔. >.<

其次就在駕駛時跟著架benz, 個benz佬手痕唧一唧洗玻璃水掃兩下水撥, 然後玻璃污水就沿著流線形的車頂噴到你全身都有. 就算你與前車保持距離,仍然噴得到. 有時四輪車主可否不要太自私, 洗大銀幕時先看看後面有無人呢?

第七位自然係的士佬, 有時那些友仔真係當電單車透明, 一見到有客馬上不顧危險去攝你位. 切你線不打燈, 明明看到電單車駛來都可以在施施然掉頭.

第八位是惹事生非的死飛仔, 他們見你是大馬力勁車就自然走來了你, 推你, 界你, 想你與他斗車. 前幾天有單新聞就是發生在鹿頸新娘潭的SUZUKI大R因為沉不住氣與飛仔斗車,結果發生意外, 賠上自已生命. 對付這些死飛仔, STEVE有幾百種方法, 以後有機會再吹. ^^

第九位是那些突然沖出馬路的盲柄途人. 有時真係防不勝防, 如果是四平八穩的四輪撞過去肯定是途人傷多點, 但是鐵騎遇到有時係好難避, 好易失控炒車. 就算直撞途人, 騎士都要受傷倒地.

第十位是彎中路面的油漬, 污水, 碎石, 當你片著彎時, 預想不到車輪會剷到這些東西, 自然是炒鑊勁.